Сарвари давлат Эмомалӣ Раҳмон бо лоиҳаи муфассали банақшагирии ҷамоатҳои шаҳрак ва деҳоти ноҳияи Рӯдакӣ шинос шуданд
![](https://nazorat.tj/wp-content/uploads/2023/10/Peshvoi-millat-Emomal-Ra-mon-bo-loi-ai-mufassali-bana-shagirii-amoat-oi-sha-rak-va-de-oti-no-iyai-R-dak-shinos-shudand.jpg)
26 октябр Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар ноҳияи Рӯдакӣ бо лоиҳаи муфассали банақшагирии ҷамоатҳои шаҳраки Сомониён, Мирзо Турсунзода, Навобод, деҳоти Роҳатӣ ва Чортеппа шинос шуданд.
Зимни муаррифии лоиҳаҳо масъулон таъкид доштанд, ки дар асоси нақшаи генералӣ қисми аввали нақшаи муфассали банақшагирии шаҳраки Сомониён дар масоҳати 79,6 гектар барои зиёда аз 19 ҳазор нафар таҳия шудааст.
Лоиҳа фарогири биноҳои истиқоматии баландошёна, 4 муассисаи таълимии ҳар кадом барои 3200 хонанда дар ду баст, 8 кӯдакистон барои аз 200 то 400 кӯдак, мактаби мусиқӣ, меҳмонхонаҳо, гулгаштҳо, варзишгоҳ бо 20 ҳазор ҷои нишаст, майдонча ва толорҳои варзишӣ, навсозии бозори “Ганҷ”, биноҳои маъмурӣ, бинои ёрии таъҷилӣ дар назди беморхонаи марказӣ, беморхона барои касалиҳои дил, навсозии Қасри фарҳанг, васеъкунии роҳҳо ва ғайра мебошад.
Тибқи хулосаи геологӣ, лоиҳа ба ду қисм тақсим шуда, дар қисми ҷанубӣ иншооти маъмурӣ, истиқоматию хизматрасонии 5-7-ошёна ва дар қисми дигар биноҳои 9-12 ошёна бунёд мешаванд. Зимни таҳияи лоиҳа санъати меъмории миллӣ ба инобат гирифта шуда, истифодаи масолеҳи баландсифати сохтмонӣ пешбинӣ гардидааст.
Бо назардошти то соли 2040 қисман ворид шудани ҳудуди ҷамоати шаҳраки Мирзо Турсунзода ба нақшаи генералии пойтахти мамлакат- шаҳри Душанбе дар қисми ҷанубу шарқии он дар заминаи бинову иншооти кӯҳнаву фарсуда дар масоҳати 10 гектар бунёди шаҳраки нав ба нақша гирифта шудааст.
Шаҳрак барои 3420 нафар аҳолӣ пешбинӣ шуда, аз биноҳои маъмурии ҷамоати шаҳрак, 60 бинои баландошёнаи истиқоматии 12-18-ошёна, муассиссаи таълимӣ барои 2400 хонанда дар як баст, кӯдакистон бо 480 ҷой, коргоҳҳои истеҳсоли маҳсулоти саноати сабук, обанбор бо ғунҷоиши 1500 метри мукааб, бинои гармидиҳӣ, майдончаи варзиш ва майдонча барои бозии кӯдакон, гулгаштҳо ва ғайра иборат мебошад.
Пешвои миллат муҳтарам Эмомалӣ Раҳмон ҷиҳати мукаммал намудани шароит барои истиқоматкунандагони шаҳрак ба масъулон маслиҳатҳои муфид дода, зимни иҷрои корҳо истифодаи масолеҳи сифатноки сохтмонӣ, санъати меъмории миллӣ ва риояи меъёри талаботи муосири шаҳрсозиро ҳатмӣ шумориданд.
Бо назардошти талаботи замони муосир маркази маъмурии Ҷамоати шаҳраки Навобод ва деҳоти Роҳатию Чортеппа ҳам таҷдид мешаванд.
Лоиҳаи муфассали банақшагирии маркази маъмурии ин ҷамоатҳо фарогири биноҳои истиқоматии 5-7-ошёна, боғчаҳои бачагона барои 200 кӯдак, майдони рамзҳои давлатӣ, муассисаи таҳсилоти миёнаи умумӣ барои 1200 хонанда дар як баст, биноҳои маъмурӣ, маркази саломатӣ ва иншооти хизматрасонӣ мебошанд ва барои аз 1200 то 1400 нафар аҳолӣ пешбинӣ шудаанд.
Лоиҳаҳо аз тарафи ҶСК “Шаҳрофар” ва КВД “Лоиҳакаш”-и Кумитаи меъморӣ ва сохтмони назди Ҳукумати Ҷумҳурии Тоҷикистон таҳия гардидаанд.
Президенти мамлакат, Пешвои миллат муҳтарам Эмомалӣ Раҳмон ба лоиҳаҳои муфассали банақшагирии ҷамоатҳои шаҳраку деҳоти ноҳияи Рӯдакӣ баҳои баланд дода, масъулонро барои назорати пурраи ҷараёни корҳо ва таъмини сифати сохтмон муваззаф намуданд.